Уладзіслаў КЛІМОВІЧ: Выходзілі на матч толькі з думкамі пра перамогу Вярнуцца да спісу
— Сёння зноў прайгралі «Дынама» 0:1. Што менавіта не атрымалася ў гульні?
— Атрымалася даволі баявая гульня, было вельмі шмат барацьбы. Былі цяжкія ўмовы надвор'я, дождж ідзе ўжо другі дзень. Ад гэтага поле было залішне мяккім. Не задаўсянам пачатак матчу. У нас было вельмі шмат памылак, мы гулялі павольна і ад гэтага ў «Дынама» было шмат момантаў. Бліжэй да сярэдзіны першага тайма гульня выраўнавалася, нават можа з невялікай нашай перавагай далей праходзіла. Ад гэтага толькі больш крыўдна, прапускаць мяч у канцы сустрэчы, калі ідзе роўная барацьба. Чарада дробных памылак прывяла да гэтага голу. На жаль, у нас не атрымалася адыграцца, хоць у канцы матчу літаральна ўсёй камандай беглі наперад. Выходзілі на матч толькі з думкамі пра перамогу. Вельмі хацелі наблізіцца да лідзіруючай тройцы, не адстаць і трымаць іх у напружанні, каб былі шанцы ў далейшым іх нагнаць.
— Наколькі адбіваецца адсутнасць Савіцкага ў камандзе?
— Паша наш стылеўтваральны гулец, які можа вырашыць зыход матчу. Вядома, яго нам не хапае і ён бы дапамог камандзе. Гэта несумненна. Ён атрымаў пашкоджанне і тут нічога не зробіш. Каманда ўся стараецца, працуе і за яго ў тым ліку. Самае галоўнае ў гэтай справе не спяшацца, вылечыцца да канца, а потым ужо выходзіць на поле. У далейшай частцы чэмпіянату ён нам яшчэ дапаможа.
— Нам застаецца сканцэнтравацца на барацьбе за 4-е месца, ці яшчэ можна памарыць аб барацьбе за больш высокія месцы?
— Тут усё вельмі проста. Мы будзем гуляць на перамогу ў кожным матчы, а ў канцы паглядзім, на якое месца мы зможам прэтэндаваць. Калі будзем перамагаць і наблізімся да трэцяга месца, то вядома ж будзем змагацца за яго.
