Валерый ЖУКОЎСКІ: Не згодны з тым, што пераход – крок назад у кар'еры Вярнуцца да спісу
BY.TRIBUNA.COM • 1 лютага 2017 года • 12:44
Андрэй МАСЛОЎСКІ
У мінскае «Дынама» Валерый Жукоўскі пераходзіў у статусе аднаго з лепшых паўабаронцаў чэмпіянату. За сезон у «Нафтане» плеймекер набраў 18 (5+13) ачкоў, дзякуючы чаму яго ў сталіцы і зацемілі. Пачатак быў абнадзейваючым. У шасці матчах Жукоўскі забіў двойчы і яшчэ столькі ж раз дапамог вызначыцца партнёрам. Але гэтым усё і абмежавалася. З прыходам Сяргея Бароўскага хаўбек страціў месца ў складзе і завяршаў сезон у статусе рэзервіста. Кантракт з футбалістам «Дынама» падаўжаць не стала, і ўраджэнец Ліды перайшоў у «Нёман», які завяршыў сезон на 14-м месцы.
— Як пасля «Дынама» аказацца ў «Нёмане»?
— Ой, ведаеце, усё ж бывае ў жыцці. У кожнай сітуацыі трэба шукаць пазітыў – я ў сваю родную вобласць нарэшце вярнуўся. Мяне клікалі раней, але ўсё ніяк не атрымлівалася. Ды і цяпер клубы, якія цікавіліся, не былі такія актыўныя, як «Нёман».
Немалую ролю ў пераходзе адыграла тое, што я добра знаёмы з Ігарам Кавалевіч. Па вялікім рахунку, ішоў да свайго трэнера. Мікалаіч патэлефанаваў і прапанаваў перайсці. Трохі падумаў і пагадзіўся. Так, у мінулым годзе «Нёман» змагаўся за выжыванне, але калі браць толькі другі круг, то па набраных ачках гэта моцны серадняк. Думаю, у гэтым годзе каманда падбярэцца нармальная.
Не згодны з тым, што пераход – крок назад у кар'еры. Сэнс быў заставацца ў «Дынама», калі мяне там не вельмі хацелі бачыць? Я разумеў, што Сяргей Бароўскі на мяне не разлічвае – я не гуляў амаль усю другую палову сезона. Значыць, не вельмі-то падыходжу пад яго трэнерскую філасофію і сістэму.
