Форма каманд: белыя футболкі і трусы — зялёныя футболкі і трусы.

У той час пакуль асноўная каманда гродзенскага «Нёмана» шукае шлях наверх, дублёры упэўнена гэтым шляхам падбіраюцца да вяршыні турнірнай табліцы першынства.

У апошні раз жоўта-зялёным ўдалося перайграць дубль сталічных дынамаўцаў ліпені 2012 года. У той год наш дубль выглядаў пераканаўча і па выніках чэмпіянату стаў чацвёртым, адстаўшы ад бронзавага салігорскага «Шахцёра» на 13 ачкоў.

Сёння ў Стайках падапечныя Дзмітрыя Троска ўпэўнена перайгралі дубль мінскага «Дынама». Да перапынку гаспадары не мелі ніводнага хоць трохі галявога моманту. Усе намаганнi аднаго з лідэраў чэмпіянату разбіваліся на подступах да штрафной. Другі матч запар вельмі надзейна згуляла сярэдняя лінія каманды. Добры ў цэнтры поля быў Аляксей Носко, які не толькі пераканаўча сыграў ў разбурэнні нападаў суперніка, але і шмат карыснага зрабіў пры развіцці выпадаў гродзенцаў. Ужо да 23-й хвіліне жоўта-зялёныя забілі два мячы і да пачатку другога тайма перавялі гульню ў спакойнае рэчышча. Першы мяч госці правялі на 18-й хвіліне. У які раз у сезоне выніковай стала штучная камбінацыя: Квенцар аддае вертыкальны пас па левым краі на Кругленю, той цягне мяч, чакае забягання капітана і аддае яму на ход, адкуль вынікае прастрэл нізам у штрафную. Сенкевіч на блізкай штанзе па мячы не патрапіў, затое на далёкай штанзе гэта ўдалося зрабіць Буцько – 0:1

Літаральна праз пяць хвілін у браму Плотнікава ўляцеў яшчэ адзін мяч. Чайка зрабіў навес у штрафную з правага флангу атакі, а Кругленя галавой скінуў мяч у бок Сенкевіча. Ад спіны нашага галеадор мяч адляцеў зноў Круглені, які і расстраляў браму суперніка з блізкай адлегласці – 0:2. Шакуючы пачатак матчу негатыўна паўплывала на гульню бела-сініх, якія да канца тайма так нічога ў атацы і не зрабілі.

Пасля перапынку падапечныя Сяргея Гурэнкі вялікімі сіламі пайшлі наперад. Першая небяспечная атака мінчан здарылася ўжо на стартавай хвіліне другога тайма. Які ўступіў адразу ж пасля перапынку ў гульню Савосцікаў не трапіў у браму, пасля таго, як мяч адскочыў ад перакладзіны. На 50-й хвіліне ўсё той жа Савосцікаў са штрафнога паслаў мяч у створ брамы, аднак Шышлоў зрэагаваў і адбіў мяч перад сабой. Мяч адляцеў убок Кійко, мінчанін паспрабаваў прабіць праз сябе і прамазаў. Яшчэ праз восем хвілін пасля падачы Савосцікавым кутавога на выхадзе памыліўся Шышлоў. Здавалася, нападнік мінчан галавой прабіў побач са штангай.

Адразу ж нашы адказалі яшчэ больш небяспечным кутавым. Пасля падачы Квенцара мяч пераляцеў у брамніка «Дынама» і апусціўся проста на галаву Семяновіча. Перад нападанікам быў пусты кут брамы, але Яўген прабіў побач са штангай.

Здавалася, што нашым зноў удалося ўзяць мяч пад кантроль, аднак дынамаўцы ўсё ж забілі. Галявая атака атрымалася неверагодна імклівай і абсалютна нелагічнай. Нашы падавалі кутавы і самі вынеслі мяч за межы штрафной, дзе яго падхапіў гулец «Дынама». Гаспадарам спатрэбілася зрабіць усяго дзве перадачы, каб адправіць мяч у сетку і скараціць лік у матчы. Забег па флангу Шавялёў скончыўся выверанай перадачай на Юзэпчука, якога пакінулі нашы абаронцы – 1:2.

Да канца матчу гаспадары стварылі адзін небяспечны момант і маглі зраўняць лік. На 85-й хвіліне сустрэчы да мяча, пушчанай уздоўж брамы Юзэпчукам, ледзь не дацягнуўся Кійко. Магчымасці павялічыць лік былі і ў гродзенцаў, але гасцям замінала стомленасць. Хлопцы здзяйснялі ўжо вельмі недарэчныя памылкі ў простых, здавалася б, сітуацыях: нерэалізаванымі апынуліся некалькі выхадаў тры ў два. Тыя, хто бег на штурм брамы суперніка гаспадары раз за разам агалялі тылы, аднак, лік больш не змяніўся.

Пасля сённяшняй перамогі гродзенцы ўшчыльную падабраліся да трэцяга месца, на якім размясціліся адразу дзве каманды – салігорскі «Шахцёр» і мінскае «Дынама». Дарэчы сказаць, абедзве гэтыя каманды ў першым крузе свае матчы дублю «Нёмана» прайгралі. Праз тыдзень, 26 чэрвеня, дубль прымае «Слуцк». Цікава, што ў матчах чэмпіянату, случчакоў наша маладзёжка яшчэ не абыгрывала: ў 2014 годзе – 1:1 дома і 1:1 у гасцях, а ў мінулым сезоне – 0:0 дома і 2:2 у гасцях.