Форма каманд: чырвона-чорныя майкі, чорныя трусы — жоўтыя майкі і трусы.

Другі год апошні матч міжсезоння «Нёман» гуляе ў Літве з «Тракаем». Калі для жоўта-зялёных гэты матч разглядаўся ў якасці генеральнай рэпетыцыі да стартуючага ў бліжэйшыя выходныя чэмпіянату, то для літоўскай каманды матч супраць гарадзенцаў быў патрэбны для падтрымання формы і прагляду некалькіх гульцоў. Нагадаем, што ў мінулым годзе гродзенцы буйна абыгралі рыцараў з лікам 4:1.

Чэмпіянат Літвы стартаваў яшчэ 2 сакавіка і «Тракай» сыграў ўжо 4 матчы. Прайграўшы ў стартавым туры «Жальгірысу» (0:2), рыцары па чарзе абыгралі «Каўнас» (2:0), «Стумбрас» (3:2) і «Судуву» (2:0). Пасля 4 тураў «Тракай» з дзевяццю ачкамі размясціўся ўслед за сталічным «Жальгірысам».

На матч з гродзенцамі галоўны трэнер гаспадароў Урбонас Вальдас не мог выставіць свой асноўны склад, нават калі б і хацеў. Два жалезных гульца асновы Давід Аршакян і Дэйвідас Чеснаўскіс адправіліся ў зборныя сваіх краін, а брамнік Марус Рапаліс атрымаў у апошнім матчы траўму. Дарэчы, абодва зборніка ў гульнях за свае краіны на поле не выходзілі, хоць і былі заяўлены на матчы. Аршакян застаўся ў запасе ў матчы супраць зборнай Беларусі, а Чеснаўскіх не гуляў супраць румын. Усе астатнія ў гульні з «Нёманам» прынялі ўдзел, у тым ліку і свежы тракаец Дзмітрый Рэкіш. Акрамя Рэкіша за гаспадароў згулялі ў гэтым матчы яшчэ тры беларуса – Павел Крук, Аляксандр Бычанок і Арцём Гурэнка.

ТРАКАЙ: Плюкас, Бычанок (Коханаўскас, 77), Крук (Янушеўскіс, 46), (к) Клімавічюс (Леонавічюс, 59), Шіленас (Броліо, 46), Віцікунас, Засавіцкі (Вараб'ёвас, 46), Вальскіс (Дапкус, 32), Мамаеў, Гурэнка (Месенжовас, 59), Рэкіш (Мёрфи, 77).

Не змагла і наша каманда згуляць складам, які найграваў як асноўны. У ахоўнай лініі адсутнічаў Аляксандр Пазняк, які выкліканы ў маладзёжную зборную Беларусі. Адправіўся ва Украіну вырашаць свае пытанні з дакументамі на заяўку Тарас Дурай, а ў  брамніка Уладзіміра Журава яшчэ не гатовая віза. Тым не менш, прывезены Саладоўнікавым у Літву склад выглядаў баявым.

НЁМАН: Курганскі – Лешка (Сенкевіч, 63; Квенцар, 84), (к) Сасноўскі, Горбач, Анюкевіч – Хвалько (Забелін, 84) - Чухлей, Кавалюк (Вяргейчык, 63), Васілюк (Кавалёнак, 84), Васькоў (Лукашын, 78) – Канцавы (Бомбель, 79).

Перад пачаткам сустрэчы была аб'яўлена хвіліна маўчання ў памяць аб легендзе галандскага футбола Йохане Кройфе. Вялікага Лятучага галандца не стала напярэдадні...

З першых хвілін пайшла хуткая гульня, тон якой задалі шустрыя крайнія паўабаронцы жоўта-зялёных. Да прапушчанага мяча нёманцы двойчы былі блізкія да поспеху. На трэцяй хвіліне Чухлей перахапіў мяч і сам пагражаў браме Плюкаса, але не трапіў у створ брамы. Другі момант жоўта-зялёныя стварылі пасля стандарту. Кутавы падаваў Кавалюк, Горбач мог замыкаць, але яму перашкодзілі абаронцы. У адказн на атаку «Тракай» нечакана для ўсіх адкрыў лік. Далёкім шчыльным ударам Мамаеў адолеў браму Курганскага, і мяч апынуўся сетцы брамы.

Дыктар стадыёна бадзёрым голасам абвясціў, што лік у матчы адкрыты і назваў прозвішча крыўдзіцеля гасцей. Прычым зрабіў гэта толькі на літоўскай мове. Стала цікава, ці будуць аб'яўляць галы ў выкананні нашых хлопцаў, бо пратакол матчу не запаўняўся і зрабіць гэта будзе вельмі цяжка.

Праўда, да перапынку атрымаць адказ на гэтае пытанне не ўдалося. Гульня у гродзенцаў у атацы да перапынку не ладзілася. Усе набегі на літоўсккую браму скончваліся на подступах штрафной. Зрэшты, абарона «Нёмана» да сваёй брамы таксама не падпускала. Пару далёкіх удараў Гурэнка-малодшага – вось і ўсё, што атрымалася зрабіць камандзе Урбонаса да канца тайму.

На 32-й хвіліне сустрэчы здарыўся эпізод з выдаленнем лепшага бамбардзіра «Тракая» цяперашняга сезону. Сасноўскі ў чарговы раз адабраў мяч у паўабаронцы, а той, апынуўшыся на газоне, ударыў па нагах гродзенскаму капітану. Сутычка, чырвоная правакатару і папярэджанне Сасноўскаму. Суддзя хутка астудзіў гарачыя галовы футбалістаў і не згубіў нітку гульні. Замест аддаленага з поля Вальскіса выйшаў Дапкус. Выдалення з правам замены – так было дамоўлена перад пачаткам матчу.

Пасля перапынку ўсё кардынальна змянілася. Варта было жоўта-зялёным дадаць ў руху, як абарона гаспадароў стала трашчаць па швах. Другая палова матчу прайшла пры поўным перавазе каманды Саладоўнікава. Чакаць першага ўзяцця варот «Тракая» прыйшлося 9 хвілін. Шустры Васькоў падхапіў мяч на подступах да штрафной, абыграў абаронцу, пракінуў сабе на ход і прабіў міма брамніка – 1:1.

Усё, штопачулі пасля гола трыбуны – гэта быў вокліч капітана гродзенцаў: «Давай яшчэ, не спыняцца!» Дыктар жа на гэты раз прамаўчаў. Зрэшты, як і пасля двух наступных галоў нёманцаў. За 13 хвілін да заканчэння асноўнага часу Васькоў атрымаў выдатны пас ад Васілюка і ў другі раз перайграў Плюкаса. Гродзенцы заслужана выйшлі наперад – 1:2.

Гульня камандзе давалася, і было б па-дурному сядаць у абарону дзеля таго, каб утрымаць пераможны лік. Так, да канца сустрэчы гродзенцы маглі забіць яшчэ не раз. Васілюк не выкарыстоўваў чысты выхад адзін на адзін, а Лукашына з добрай пазіцыі прабіў у брамніка.

І ўсё ж трэці гол адбыўся. Кавалёнак своечасова адкрыўся, атрымаў мяч і мог сам ставіць эфектную кропку, але ўбачыў, што Бомбель знаходзіцца ў яшчэ лепшай пазіцыі і аддаў мяч таго пад удар – 1:3.

У выніку, «Нёман» атрымаў другую валявую перамогу ў гэтым міжсезонні, і ў добрым настроі будзе рыхтавацца да пачатку чэмпіянату. Першы матч адбудзецца ўжо зусім хутка. 3 красавіка прымаем мікашэвіцкі «Граніт». Прыходзьце, каманда чакае ад вас падтрымкі!