Мы ўсе просім прабачэння Вярнуцца да спісу
Гэты год склаўся для нашага клуба вельмі няўдала. На працягу практычна ўсяго сезону мы паказвалі слабую гульню і да перадапошняга тура змагаліся за права застацца ў Вышэйшай Лізе. Матчаў, у якіх мы расчароўвалі вас, было значна больш тых, у якіх усё склалася ў нашу карысць.
Мы выдатна разумеем пачуцці, якія адчувае наш заўзятар, гледзячы на нашае выніковае 14-е месца. Будзем шчырыя: у цэлым, каманда праваліла гэты сезон. Другі круг у нашым выкананні быў крышачку лепш і трохі суцешыў агульныя ўражанні ад каманднага выступу. Дзякуючы кіраўніцтву горада і вобласці, шматлікім спонсарам і партнёрам, новаму трэнерскаму штабу і неабыякавым да лёсу клуба гульцам, Нёман здолеў пераламіць сітуацыю і захаваў прапіску ў наймацнейшым дывізіёне краіны. Паверце, знайсці ў сабе сілы і выцягнуць сябе з таго турнірнага балота, у якім мы знаходзіліся каля 16 тураў, было няпроста. Усім нам гэта каштавала велізарных высілкаў, у першую чаргу, у псіхалагічным плане. Ад кіраўніцтва клуба, трэнерскага штаба і ўсіх гульцоў мы просім прабачэньня за неапраўданыя вашыя надзеі, за тыя хвіліны бяссілля, якое мы праявілі на футбольных палях. Месца, на якім Нёман скончыў чэмпіянат, не адпавядае ні нашым агульным з вамі чаканням, ні амбіцыям клуба з даўняй гісторыяй. Мы кажам словы падзякі кіраўніцтву горада і вобласці за пастаянны ўдзел у жыцці клуба, а таксама кажам вялікі дзякуй нашым партнёрам і спонсарам. Дзякуй за тое, што, нягледзячы на нашыя вынікі, вы не адвярнуліся ад нас. Дзякуем ўсіх нашых заўзятараў і фанатаў, якія ў гэтыя цяжкія часы былі побач, заўзелі, перажывалі і своечасова падстаўлялі плячо. Без вашай падтрымкі ўсё магло быць значна горш. Дзякуй што вы ёсць і да сустрэчы ў новым сезоне, які будзе лепш.
