Са Слоніма з срэбрам Вярнуцца да спісу
27 і 28 лютага ў Слоніме прайшоў штогадовы рэспубліканскі турнір па міні-футболе сярод хлопчыкаў 2005 года нараджэння на прызы рэдакцыі газеты «Слонімскі веснік» пры спонсарскай падтрымцы службы таксі «Карат». У гэтым годзе ўдзел у турніры бралі сем каманд: дзве з іх выставіла слонімская ДЮСШ, па адной камандзе выставілі школы ФК «Слуцк», ФК «Алімпік» (Мінск), ДЮСШ г. Нясвіжа, ДЮСШ г. Бярозы і наша СДЮШАР «Нёман» (трэнер - Дзяніс Барычэўскі).
Каманды былі разбітыя на дзве групы, а пасля заканчэння групавых матчаў прайшлі паўфінальныя і фінальныя сустрэчы. Наша каманда ў групе «Б» выйграла па чарзе ДЮСШ Бярозы - 2:1, другую каманду ДЮСШ Слонім - 4:1 і менскі «Алімпік» 4:3. Гэта дазволіла камандзе заняць першае месца ў групе і выйсці ў паўфінал, у якім хлапчукі былі мацней «Слуцка» 3:2. Цікава, што ў матчах супраць «Алімпіка» і «Слуцка» хлопцы саступалі па ходзе гульні два мяча, але праявілі характар і вырвалі перамогі.
У другім паўфінале першая каманда ДЮСШ Слонім ў дадатковы час матчу перайграла хлопчыкаў з «Алімпіка».
На жаль, у фінальнай сустрэчы нашы хлопцы выпусцілі вельмі шмат добрых момантаў, а вось самі тройчы прапусцілі і саступілі хлопцам з першай каманды ДЮСШ Слонім. Выніковы лік фінальнай сустрэчы 0:3. Па выніках турніру каманда СДЮШАР «Нёман» заняла 2 месца і была ўзнагароджана медалямі адпаведнай ступені. Трэцяе месца дасталася камандзе «Алімпік» з Менска.
Склад «Нёмана»: Спас Уладзіслаў, Іваноў Павел, Васількевіч Марат, Баранеўскі Міхаіл, Шумель Кірыл, Саракула Уладзіслаў, Кацынель Максім, Сянкевіч Раман, Буднік Аляксандр, Рускіх Андрэй, Русіновіч Максім.
Лепшым гульцом у нашай камандзе быў названы Максім Кацынель, які забіў у браму суперніка 6 мячоў.
Вялікі дзякуй бацькоўскаму камітэту каманды за дапамогу ў арганізацыі паездкі.
