Дзмітрый ТРОСКА: хлопцы ад каманднай гульні атрымліваюць задавальненне Вярнуцца да спісу
Дзмітрый ТРОСКА (галоўны трэнер дубля «Нёмана»):
— Сённяшні матч склаўся ўдала для нашай каманды. Сваю браму хлопцы пакінулі ў недатыкальнасці, а забіць змаглі тры разы. Хоць момантаў было значна больш. Тым не менш, якасць нашай гульні мне спадабалася. Пачатак гульні складваўс няпроста. Сказаць, што каманда суперніка слабая нельга. Я б сказаў, што яна «калючая». Тым больш, што сёння яны былі ўмацаваныя гульцом асноўнага склада. Па падборы гульцоў яны сёння былі мацней, чым у матчы першага круга. Тым цікавей атрымаўся матч, тым лепш для нашых хлопцаў. Куды больш прыемна гуляць супраць годнага суперніка.
Практычна ўсё, што мы задумалі, было хлопцамі выканана. За выключэннем завяршальнай стадыі атакі. Ужо балюча шмат памылак было ў канцоўцы нападаў. Больш нападаў трэба было даводзіць да лагічнага завяршэння, да забітага мяча. У цэлым, дзякуй хлопцам за гульню.
— Далёкія дыяганальныя пераводы – гэта план на гэтую канкрэтную гульню, ці ж гэта становіцца нашай пастаяннай «зброяй»?
— Гэта не першая такая гульня. Наша гульня і будуецца на гэтым. Аднак усё залежыць ад суперніка, як ён абараняецца. «Славія» сёння дазваляла дзейнічаць менавіта так. Задача нашых апорных паўабаронцаў зрабіць разварот і доўгую перадачу. Сёння ў нас праходзіла адна такая перадача за другой. Таму гэта было вельмі заўважна. Калі супернік дазваляе, то чаму б нам не карыстацца гэтым.
— Сёння кожнае святкаванне гола было розным адзін ад аднаго. Хлопцы адпрацоўваюць гэты элемент на трэніроўках?
— Не, гэта яны вырашаюць паміж сабой. Нам гэта падабаецца. Гэта значыць, што ў нас ёсць калектыў. Хлопцы ад каманднай гульні атрымліваюць задавальненне і на іх тварах усмешкі. У некаторых момантах яны нават перагульваюць, гуляюць на гледача. Калі чалавек робіць працу з усмешкай на твары, атрымліваецца нашмат больш.
