Філіп РУДЗІК: Ніколі яшчэ не сустракаў такога, каб у абароне гулялі адразу сем чалавек Вярнуцца да спісу
— Мы не чакалі, што ў першым тайме абарона Дняпра будзе настолькі шматлікай. Ад гэтага ўсе нашы праблемы да перапынку: мы не ведалі, што нам з гэтым рабіць, як раскрыць абарону суперніка. Ніколі яшчэ не сустракаў такога, каб у абароне гулялі адразу сем чалавек. Такое ў маёй кар'еры здарылася ўпершыню. Працяглы час гуляць першым нумарам вельмі цяжка – на гэта сыходзіць шмат сіл.
— А што змянілася пасля антракту?
— Не ведаю, што нам у першую чаргу дапамагло пераадолець такую эшаланаваную абарону гасцей – трэнерскія падказкі або заўзятары. У перапынку трэнерскі штаб параіў хутчэй працаваць з мячом, смялей ісці ў атаку і пры любой магчымасці біць па варотах. Аднак у гэтай перамозе ёсць і заўзятарскі ўклад. Як мне падалося, яны адчулі наш баявы настрой і сваёй падтрымкай дапамаглі даціснуць суперніка. Вельмі своечасова Паша Савіцкі здолеў здзейсніць гэты праход і забіць гол, бо да канца сустрэчы заставалася не так шмат часу. Пасля гэтага нам стала гуляць нашмат лягчэй.
— Ці адчуваеце недахоп галоўнага трэнера на лаўцы?
— Ён у нас вельмі эмацыйны чалавек, таму мы яго выдатна чуем і з трыбуны. Для каманды ў гэтым плане нічога не змянілася.
