Аляксандр АНЮКЕВІЧ: нас рана хаваць Вярнуцца да спісу
— Чарговая наша параза, у матчы, як мне падалося, супраць самога моцнага на гэты момант суперніка. Як ацэніш сённяшнюю сустрэчу?
— Вынік не станоўчы. Мы прайгралі, дапусціўшы памылку ў тым эпізодзе, у якім павінны былі адпрацаваць чыста і без памылак. Не ведаю, чаму так, але пасля прапушчаных мячоў мы пачынаем гуляць раскованнее. Асабліва пасля перапынку ў нас атрымліваецца значна больш, чым да.
— Не ўласцівая для цябе сітуацыя, але ты папрасіў замену. Што здарылася?
— У сутыкненні з Човічам, быццам бы, мне дасталася па галаве. Пасля гэтага пачала кружыцца галава і я зразумеў, што больш магу нашкодзіць у гэтай сітуацыі, чым дапамагчы. У выніку папрасіў замену.
— Настроі ў камандзе? Як спрабуеце выйсці з гэтай сітуацыі?
— Псіхалагічна мы ўсе падушаныя. Нам трэба набіраць ачкі, трэба выходзіць з гэтага становішча. Згуляна ўжо пяць тураў, а ачкоў набрана, ужо вельмі мала. Заўзятары ўсё бачаць і робяць высновы. Трэба тэрмінова вырашаць, што рабіць далей. Мы патрапілі ў гэтую сітуацыю – нам з яе і выбірацца. Трэба адвесці праблему ў бок і зноў паверыць у сябе, перабудавацца. Думаю, што нам гэта па сілах.
— Выезд у Бабруйск, дома гульня з БАТЭ. Думаеш, ці ўдасца перабудавацца ў бліжэйшых турах?
— Не выключаю. У гэтым сезоне пакуль няма заведама слабых, або заведама моцных каманд. Так, мы прайгралі ў трох з пяці матчаў, але супернік не быў на галаву мацней за нас. Так атрымалася, што апанентам пашанцавала больш, чым нам. Працягвацца бясконца так не можа. Мы гуляем далёка не ідэальна, але супернікі па чэмпіянаце нічым не лепш. Вылучаецца толькі БАТЭ, але і яны не без граху ў абароне. Можна гуляць з усімі, і трэба гуляць з усімі. Толькі трэба разабрацца самім у сабе, што на дадзеным этапе важней. Не набралі ачкоў з лёгкімі, як усе думалі супернікамі, значыць, будзем набіраць у гульнях супраць цяжкіх. Нам трэба іх набіраць.
— Як думаеш, чаму каманда працягвае мала забіваць.
— Не ведаю. Шчыра скажу, цяжка сказаць. У камандзе вельмі высакакласныя нападнікі. Думаю, што ніхто не будзе аспрэчваць гэтае. Можа паразумення ў атакуючых дзеяннях пакуль не хапае, але мы выправім і гэтую сітуацыю. Нас рана хаваць.
