Мінус Анюкевіч, плюс Нікулін Вярнуцца да спісу
Аляксандр Анюкевіч рана раніцай пакінуў трэніровачны лагер і адправіўся ў Турцыю, дзе пройдзе прагляд у казахскім клубе «Іртыш» з Паўладара. Сёння казахі павінны згуляць супраць «Нафтахіміка» з горада Ніжнекамска.
З трох гульцоў, якія пад'ехалі на гульню супраць «Мінска», у Гродна з камандай адправіўся толькі расіянін Аляксандр Нікулін. Двое астатніх – Кірыл Алексіян і Дзмітрый Хлебасолаў, далі дабро на ўдзел у жодзінскім турніры «Белазавец-2017». Таму мы іх яшчэ ўбачым у складзе нашай каманды.
Аляксандр Нікулін (22.07.1997; рост – 184 см; вага – 78 кг) з'яўляецца выхаванцам спецыялізаванай школы-інтэрната ФК «Кубань». Выступае на пазіцыі цэнтральнага нападніка. Першым футбольным трэнерам для Аляксандра стаў яго бацька Андрэй Нікулін, а ў інтэрнаце з будучыняй футбалістам працаваў Аляксандр Алегавіч Ламар. Пасля заканчэння інтэрната ў якасці футбаліста Аляксандр паспеў правесці толькі адзін паўнавартасны сезон. У 2016 годзе 19-гадовы нападнік выступаў у вышэйшай лізе Краснадарскага краю і абараняў колеры клуба «ГНС-Спартак». У выніковай табліцы чэмпіянату краснадарскі клуб заняў сёмае месца з дзесяці ўдзельнікаў.
