Судзейская брыгада Вярнуцца да спісу
Камісія прызначэнняў дэпартамента судзейства і інспектавання АБФФ зрабіла прызначэнні судзейскіх брыгад на матчы 29-га тура Вышэйшай Лігі. На паядынак у Барысаве, дзе «Нёман» у суботу, 18 лістапада, пазмагаецца з БАТЭ, у якасці галоўнага арбітра каманды выведзе на поле Сяргей Цынкевіч (Асіповічы, арбітр ФІФА).
На лініях яму будуць дапамагаць магілёўцы Віталь Малюцін і Яўген Раманаў. Чацвёрты суддзя - Сяргей Чыстоў (Мінск).
Днём раней рэзервовы арбітр рассудзіць матч дублюючых складаў. Дапамагаць яму будуць жодзінец Уладзімір Русак і лайнсмен з Барысава Аляксандр Апет. Абодва матчы будзе інспектаваць мінчанін Браніслаў Ясінскі.
Сяргей Цынкевіч матчы наймацнейшага дывізіёна судзіць з 2008 года. Сустрэча ў Барысаве стане для суддзі 172 ў Вышэйшай Лізе. У папярэдніх матчах арбітр вынес 523 папярэджання, 10 з якіх былі для футбалістаў паўторнымі. Яшчэ пяць разоў выдаляў гульцоў, паказаўшы прамую чырвоную картку. 41 раз прызначаўу браму адной з каманд адзінаццаціметровы ўдар.
Матчы гродзенскага клуба судзіць даволі часта. У гэтым сезоне Цынкевіч будзе ў трэці раз працаваць на матчах нашай каманды. Папярэднія дзве сустрэчы скончыліся ўнічыю: у Гомелі гродзенцы згулялі 2:2, а ў Салігорску разышліся мірам з лікам 0:0. У матчы з «Шахцёрам» Цынкевіч ужо на 63-й хвіліне пакінуў нашу каманду удзесяцёх, выдаліўшы ўкраінца Руслана Зубкова. А праз 9 хвілін выдаліў з тэхнічнай зоны і галоўнага трэнера гродзенскага клуба Ігара Кавалевіча.
Усяго Сяргей Цынкевіч 44 разы судзіў гродзенскі клуб: 10 раз у Кубку (+3=2-5, мячы 9-10), у тым ліку і фінальны матч з «Шахцёрам», а таксама 34 матчы ў першынстве краіны (+11=10 -13, мячы 35-48). У рамках чэмпіянату Беларусі жоўта-зялёныя 18 разоў пры Цынкевічы гулялі на сваім полі (+7=4-7, мячы 24-27), а таксама 16 разоў спрабавалі зарабіць ачкі ў гасцях (+4=6/6, мячы 11-21 ).
Матчы з удзелам «Нёмана» і БАТЭ судзіў чатыры разы. Усе чатыры сустрэчы скончыліся перамогай барысаўскага клуба. У чэрвені 2010 года гродзенцы дома былі разгромленыя з лікам 0:5, а ў верасні мінулага года прайгралі ў Барысаве з лікам 0:4. Яшчэ дзве паразы з аднолькавым лікам 1:2 здарыліся 27 чэрвеня 2012 і 31 жніўня 2014. У гэтых матчах 4 разы папярэджваў гродзенцаў і 7 разоў барысаўчан, 1 раз выдаліў нашага гульца, а таксама прызначыў па адным пенальці ў браму кожнай з каманд. Усяго ў матчах з удзелам «Нёмана» (кубак і чэмпіянат) паказаў 135 жоўтых картак (67 гульцам «Нёмана», 68 - гульцам суперніка), 8 разоў выдаляў гульцоў з поля (6/2), 10 раз прызначаў пенальці (5/5 ).
