«Нёман»-д — «Гомель»-д: нічыя Вярнуцца да спісу
Матч двух каманд пройдзе сёння ў Футбольным манежы, пачатак сустрэчы ў 12:00.
Перад сённяшняй сустрэчай каманды падзяляюць 18 ачкоў. Гродзенцы ў 25 матчах набралі 42 ачкі (+12=6-7, мячы 54-32) і займаюць у табліцы 7-е месца. Нашы супернікі ў гэтым сезоне выступаюць значна горш, што неўласціва для гомельскага моладзевага футбола. У двух апошніх сезонах да вылету каманды з вышэйшага дывізіёна дубль «Гомеля» быў у прызёраў. У 2014 годзе гомельская маладзёжка станавілася другой у першынстве дублёраў, а в сезоне 2015 года занімалі трэцяе месца. На сённяшні дзень наш супернік абзавёўся усяго 24 ачкамі (+7=3-15, мячы 23-43), якіх хапае толькі на перадапошняе 15 месца.
У мінулым туры дубль «Гомеля» дома саступіў жодзінскаму «Тарпеда-БелАЗ» з лікам 1:2, а наша каманда дзякуючы аўтаголу суперніка дома перайграла «Гарадзею» 1:0.
Дома гродзенскі дубль гуляе лепш, чым на выездзе. У Гродне жоўта-зялёныя зарабілі 24 ачкі з 42 набраных у сезоне (57,14%). На сваім полі жоўта-зялёныя атрымалі 7 перамог («Слуцк» 1:0, «Нафтан» 4:0, «Крумкачы» 4:1, «Іслач» 7:0, «Дняпро» 2:1, «Тарпеда-БелАЗ» 4:0, Гарадзея 1:0),а ў гасцях святкавалі перамогу пяць разоў («Іслач» 1:0, «Гарадзея» 5:0, «Гомель» 1:0, «Шахцёр» 2:1 і «Слуцк» 4:1).
Статыстыка хатніх гульняў гродзенцаў: +7=3-2 (мячы 29-12). На сваім полі наша каманда саступіла толькі «Віцебску» і БАТЭ.
У «Гомеля» набіраць ачкі на выездзе атрымліваецца значна горш, чым на сваім полі. Дома каманда найграла на 17 ачкоў (+5=2-6, мячы 12/11), а ў гасцях за ўсё на 7. На чужых палях былі абыграны «Тарпеда-БелАЗ» 5:2 і «Віцебск» 2:1, у той час як дома гамяльчане перамагалі 5 разоў ( «Слуцк» 2:0, «Іслач» 3:1, «Віцебск» 1:0, «Нафтан» 2:0, «Дняпро» 2:0). Статыстыка выязных матчаў дубля «Гомеля»: +2=1-9, мячы 11-32.
Наша каманда ў гэтым сезоне выступае вельмі вынікова. У 25 матчах жоўта-зялёныя 54 разы прымушалі суперніка пачынаць з цэнтра поля, што ў сярэднім складае 2,16 забітых мячоў за гульню. У гамяльчан гэты паказчык ніжэй адзінкі – 0,92 (23 мяча ў 25 гульнях).
Галы нашых супернікаў на рахунку наступных футбалістаў: 5 – Аляксей Філіпенка, 3 – Э.Адамако, па 2 – С.Дзічэнкоў, Д.Барадзін, А.Саўчанка, па 1 – М.Васпукоў, Р.Кенжэеў, І.Літвінаў, У.Новік, А.Янчанко, Е.Барсукоў, І.Савасцьянаў. Двойчы супернікі дзівілі сваю браму самі.
У складзе гродзенскага дубля лепшым бамбардзірам з'яўляецца Артур Бомбель, на рахунку якога 10 мячоў. Следам за ім размясціліся: 8 – В.Журневіч (выступае цяпер за польскі клуб «Зніч»), 7 – М.Кругленя, 4 – Д.Хлебасолаў па 3 - Д.Кавалёнак, Д.Вашкевіч, Д.Васкабойны, па 2 – Я.Сакута, Р.Лакціёнаў (выступае за ўкраінскі клуб «Інгулец»), па 1 – М.Клунок, В.Сыріська, М.Яблонскі, К.Карпенко, В.Зубрыцкі, Р.Сенкель, Э.Лех, А .Горбач, А.Трюхан, Я.Яроцкі (вярнуўся ў мінскае Дынама). Адзін мяч супернік забіў сабе сам.
У матчы першага круга жоўта-зялёныя на выездзе мінімальна перайгралі сённяшняга суперніка з лікам 1:0 (Журневіч 74-пен).
НЁМАН-д (Гродна) — ГОМЕЛЬ-д (Гомель) – 1 : 1 (0 : 0)
НЁМАН: Курганскі – Хвалько, Карпенка, Вегера, Зубрыцкі, Кругленя, Сырыська, Мякіш, Леўша, Бомбель, Пілец. Запасныя гульцы: Агапаў – Капко, Кузьміцкі, Трухан, Кобрын, Васкабойны, Вашкевіч. Галоўны трэнер – Дзмітрый Троска.
ГОМЕЛЬ: Гулін – Кружылін, Барсукоў, Сідарэнка, Дзевяцерыкоў, Мілеўскі, Музычэнка, Данілкоў, Васпукоў, Клімец, Філіпенка. Запасныя гульцы: Гурскі, Барсукоў, Шкваркоў, Забродскі. Галоўны трэнер – Віктар Барэль.
Галы: 0:1 — М.Барсукоў (74-г, пас ____ з кутавога), 1:1 — Карпенка (87, пас – А.Бомбель).
Гродзенцы пачалі матч вельмі ліха. У першай дваццацімінутцы жоўта-зялёныя стварылі тры паўнавартасных моманта для ўзяцця гомельскай брамы не кажучы ўжо пра шматлікія пробы ўразіць браму далёкімі ударамі. Больш усіх у завяршальнай стадыі шчыраваў Уладзіслаў Сырыська, на рахунку якога 4 небяспечных ўдара – два з-за межаў штрафной, два з больш блізкай дыстанцыі. Першы і самы сапраўдны момант наша каманда стварыла на 9-й хвіліне. Кругленя дыяганальнай перадачай перавёў мяч на правы край атакі, Леўша ў штрафной мяч прыняў і скаціў ў цэнтр пад удар Сырыська. На жаль, мяч пасля ўдару паўабаронцы праляцеў побач са штангай. Праз тры хвіліны гаспадары прыціснулі гамяльчан да брамы і тройчы ў адной атацы нанеслі ўдар. Два ўдары былі блакаваныя абаронцамі, а Кругленя з забойнай пазіцыі паслаў мяч міма мэты. На зыходзе васемнаццатай хвіліны Кругленя лёгка разабраўся са сваім апанентам на флангу, увайшоў у штрафную і нізам прастрэліў уздоўж брамавай. Абаронцы прабіць не дазволілі, мяч дайшоў да Бомбеля, які накруціў у штрафной дваіх абаронцаў, на замаху прыбраў трэцяга і прабіў у блізкі кут. У чарговы раз брамнік гасцей заняў правільную пазіцыю і намёртва ўзяў мяч. Пасля дваццатай хвіліны нашы збавілі абароты, што дазволіла гомельскай камандзе перавесці дух. Да канца тайма лік не змяніўся.
Цягучая гульня без асаблівых пагроз брамы прадоўжылася і пасля перапынку. Гаспадары валодалі перавагай, але да лагічнага завяршэння атакі не даводзілі – ўдары па браме практычна адсутнічалі. У пачатку тайма з-за штрафной прабіў Карпенка, а за чатыры хвіліны да канца сустрэчы выйшаўшы на замену Трухан. Усплёск галявых момантаў здарыўся на стыку 72 і 73 хвілін. Абодва разы небяспека каля брамы сапернікаў узнікала пасля кутавых удараў. Гродзенцы на 72-й хвіліне лік адкрыць не змаглі – на шляху мяча ўстаў брамнік, а госці праз дзве хвіліны забілі. Гамяльчане правялі хуткую контратаку, у якой двойчы нанеслі ўдар па браме Агапава. Першы ўдар быў заблакаваны, а з паўторным ударам Філіпенка справіўся Агапаў, перавядучы мяч на кутавы. Гэты стандарт і стаў для гродзенцаў фатальным – Барсукоў галавой забіў мяч пад папярэчыну.
Пройгрыш у гэтай сустрэчы быў бы звыш несправядлівым вынікам. Калі да канца матчу заставалася ўсяго тры хвіліны выратавальны гол забіў Карпенка. Дзеля справядлівасці варта адзначыць, што Кірыл не біў па браме Гуліна. Абаронца ад бакавой лініі рабіў падачу ў штрафную, а мяч па дугападобнай траекторыі апусціўся ў дальні кут брамы. Брамнік «Гомеля» быў бяссільны дапамагчы сваёй камандзе. На жаль, на яшчэ адзін мяч часу проста не хапіла.
Поўная версія пратакола матча «Нёман»-д — «Гомель»-д
