Заўвага суддзі матчу: На 83-і хвіліне з лаўкі запасных ФК "Нёман" на футбольнае поле была выкінутая бутэлька з вадой.

Форма каманд: зялёныя майкі і трусы — белыя майкі, чорныя трусы.

Суботні матч супраць аўтазаводцаў стане ў гісторыі супрацьстаяння двух каманд 37-ым, калі браць у разлік толькі матчы чэмпіянату, і 38-ым, калі да іх дадаць яшчэ адну кубкавую сустрэчу. Агульныя лічбы абсалютна роўныя ў выніках (+12=13-12), а перавага на баку гродзенцаў толькі ў розніцы забітых і прапушчаных мячоў (40-37). Калі ж разглядаць толькі гульні чэмпіянату, то пры роўнасці мячоў (37-37), перавага ў адну перамогу будзе ўжо на баку жодзінцаў (+11=13-12).

Так склалася, што ў хатніх матчах супраць «Тарпеда» гродзенцы выступаюць значна лепш, чым на выездзе: усяго тры паразы, пры васьмі пераможных матчах.

Поўная гісторыя сустрэч «Нёмана» і «Тарпедоа-БелАЗ» (Жодзіна)

• Вынікі галасавання

  «Нёман» - «Тарпеда-БелАЗ»: прадскажы вынік сустрэчы

  • перамога Гродна
    78%
  • нічыя
    7%
  • перамога Жодзіна
    15%

СУДДЗІ

Судзейская брыгада: Сяргей Цынкевіч (Асіповічы) – Аляксей Вайцяшонак (Асіповічы), Аляксей Кавалёў (Асіповічы). Рэзервовы арбітр – Дзмітрый Доля (Гродна). Інспектар матча – Генадзь Якубоўскі (Мінск).

Сяргей Цынкевіч матчы Вышэйшай Лігі судзіць з 2008 года.

Арбітр у саракавы раз будзе судзіць матч з удзелам нашага клуба: +14=9-16, мячы 40-47, працэнт набраных нашым клубам ачкоў -43,59%. 29 з іх прыйшліся на матчы чэмпіянату краіны (+11=7-11, мячы 31-37), 16 з якіх жоўта-зялёныя правялі дома (+7=3-6, мячы 22-22). На матчах «Нёман» – «Тарпеда» Цынкевіч працаваў 4 разы. Усе чатыры матчы былі згуляныя ў рамках чэмпіянату Беларусі. Дома гродзенцы пры гэтым суддзі двойчы перамагалі (2012 – 2:1, 2013 – 3:0), а вось у Жодзіна перайграць суперніка не ўдалося (2010 – 0:2, 2013 – 1:1).

Дапамагаць яму будуць Аляксей Кавалёў і Аляксей Вайцяшонак. На рахунку Кавалёва 21 сустрэча жоўта-зялёных (+7=4-10, мячы 20-27; 39,68%), а ў Вайцяшонка такіх матчаў 3 (+1=1-1, мячы 2-3; 44,44% ).

СКЛАД НА СЕЗОН

Па заканчэнні мінулага чэмпіянату каманду пакінула адразу 15 гульцоў. У летняе трансфернае вакно ў «Нёман» перайшоў Арцёма Канцавы, у міжсезонне далучыўся яшчэ адзін экс-гулец жодзінскага клуба Арцём Васькоў. У зваротным напрамку не прыйшоў ніхто.

З цяперашняга складу жодзінцаў, калі не лічыць галоўнага трэнера каманды Ігара Крывушэнкі, толькі Вадзім Дземідовіч мае ў сваёй кар'еры гродзенскі перыяд. Нападнік правёў у Гродне два сезона і ў 60 матчах вызначыўся 10 разоў. Два сезоны выступаў за гродзенскі клуб і Крывушэнка. У 1985 і 1986 гадах нападнікі ў 56 матчах першынства СССР 9 разоў засмучаў супернікаў «Хіміка».

Поўная статыстыка гульцоў каманды «Нёман» (укладка «Статыстыка»)

УКЛЮЧАЙСЯ І ГЛЯДЗІ

Прамая трансляцыя матчу 10-га тура «Беларусбанк – чэмпіянат Рэспублікі Беларусь па футболе сезона 2016 года сярод каманд вышэйшай лігі» «Нёман» (Гродна) – Тарпеда-БелАЗ (Жодзіна).

Матч адбудзецца 4 чэрвеня. Пачатак сустрэчы ў 18.30. Уключайцеся за 15 хвілін да пачатку гульні.

Трансляцыя з Гродна

Жоўта-зялёныя ў чарговы раз прайгралі, прычым буйна. Аднак пачатак сустрэчы не прадвяшчаў такога развіцця падзей. Гродзенцы падоўгу валодалі мячом, спрабавалі камбінаваць і выявіць моцную абарону жодзінскай каманды. І хай атрымлівалася ў нападзе не шмат чаго - да рэальных пагроз справа не даходзіла, але наша каманда прыціснула гасцей да брамы. Колькасць кутавых, пададзеных камандамі за матч красамоўна кажа пра гэта: адзінаццаць супраць двух. Забіты на зыходзе паўгадзіны тарпедаўцамі гол выглядаў ужо вельмі нелагічным. Захапіўшыся пазіцыйнай аблогай жодзінскай брамы, наша каманда двойчы пазяхнула востры выпад гасцей. І калі ў першы раз Скавыш прабіў міма брамы Курганскага, то ў другі раз зрабіў усё па-майстэрску, галавой пераправіў адскочыўшы ад папярэчыны брамы мяч міма брамніка. У які раз у цяперашнім чэмпіянаце наша абарона пакінула галкіпера сам-насам з гульцом суперніка. У мінулым туры дазволілі гульцу мазырскай «Славіі» двойчы без перашкод расстрэльваць які змагаецца да апошняга Курганскага, а ў гэтым пакінулі без увагі Скавыша. Максім гэтым падарункам скарыстаўся спаўна, адкрыўшы лік у матчы - 0:1. На жаль, гэтая памылка абароны аказалася не адзінай у гэтай гульні.

Часу для выпраўлення сітуацыі было звышдастаткова, з шашкамі нагала ніхто бегчы не збіраўся. З такім супернікам як «Тарпеда-БелАЗ» гэта падобна на смерць. Наша каманда працягнула расцягваць ахоўныя парадкі суперніка і праз 10 хвілін была блізкая да поспеху, але галкіпер гасцей забароненым прыёмам перапыніў патэнцыйна галявую атаку. Прычым зрабіў ён гэта за межамі штрафной. Канцавы пракінуў мяч міма брамніка і таму, каб спыніць памкнёнага на пустую браму нападніка, заставалася толькі фаліць. Што і было паспяхова зроблена - Фамічоў двума рукамі абхапіў гродзенца і заваліў яго на газон. Сумневу ніякага ў гэтым эпізодзе няма - чыстая чырвоная картка.

На жаль, Цынкевіч паступіў інакш. Ён усяго толькі папярэдзіў брамніка гасцей, але і гэта суддзя зрабіў няўмела. Усе людзі на стадыёне ўбачылі, быццам бы жоўтая картка была паказана Канцавому, які бурна апісвае спрэчны эпізод. Не толькі гледачы, але і журналісты, якія назіралі за матчам. Невыразныя дзеянні арбітра спарадзілі памылку ў анлайн трансляцыях, у якіх «гарчычнікам» памылкова быў пакараны менавіта гулец гарадзенскай каманды.

Напэўна дзеянні суддзі ў гэтым эпізодзе будуць апраўданыя. Трактаваць як трэба відавочнае ў нас умеюць. Можна сказаць, напрыклад, што Канцавы да брамы не рухаўся, а калі рухаўся, дык яўнай магчымасці забіць гол не было, бо там быў ажно цэлы абаронца ў браме. Паспрабуй яго прабіць! А ўцёк бы ён наогул ад другога абаронцы? Хутчэй за ўсё, каб не пабег, там жа супер-хуткасны хлопец... Карацей, пункт пяць можна не разглядаць.

Дысцыплінарныя пакаранні. Парушэнні, каральныя выдаленнем. Пункт 5 абвяшчае: пазбаўленне суперніка, прасоўванне да брамы, яўнай магчымасці забіць гол з дапамогай парушэння, якое караюць вольным, штрафным ці 11-метровым ударам.

Пасля здзейсненага вамі сур'ёзнага парушэння ПДР, работнік ўпаўнаважаных на тое органаў не будзе дадумваць, як бы там далей магла развівацца сітуацыя - рушыць услед незваротнае пакаранне, аж да пазбаўлення правоў. Вось і ў гэтым эпізодзе, мы лічым, Фамічова павінны былі пазбавіць права працягнуць гульню далей.

Гэты эпізод адабраў так шмат энергіі, што да канца першага тайма нашы так і не прыйшлі ў сябе. Абурэньне перашкаджала гуляць.

На другі тайм каманда выйшла вельмі хутка, не даседзеўшы ў распранальні пяць пакладзеных на адпачынак хвілін. Хлопцы рваліся ў бой. На жаль, працягнуць матч не змог Васькоў. Вінгер атрымаў траўму і быў заменены ў перапынку на Бомбеля.

Другі тайм стаў люстраным адлюстраваннем першага. Гаспадары вялікімі сіламі ішлі наперад, а госці небяспечна контратакавалі. Другі сезон запар пазіцыйныя атакі гарадзенцам даюцца з вялікай працай, а забітыя галы яшчэ з больш вялікай. Забіць не ўдалося і ў гэтым матчы, хоць абарона гасцей не выглядала бездакорна. Будзь больш удачлівымі нашыя нападнікі, лік атрымалася б зраўняць. Самы рэальны момант на 54-й хвіліне выпусціў Раман Васілюк. Выйшаўшы на ўдарную пазіцыю, голеадор павінен быў забіваць, аднак прабіць Фамічова і на гэты раз не ўдалося.

За 20 хвілін да канца матчу здарыўся яшчэ адзін даволі спрэчны эпізод. Савіцкі прыняў мяч у штрафной, пракінуў яго паміж двума абаронцамі і адразу ж атрымаў па нагах.

Падзенне і жоўтая картка. Толькі паказаная яна была нашаму гульцу, нібыта за сімуляцыю... Гэта была другая грубая памылка суддзі ў гэтым матчы. Слабых біць заўсёды было прасцей за ўсё. А мы пакуль слабыя...

Напружанне ў матчу ўзрастала, і гэта адыграла на руку гасцям. Свежы Вадзім Дземідовіч скарыстаўся дзвюма памылкамі нашага капітана. На 80-й хвіліне Сасноўскі ў штрафной рукой перапыніў палёт мяча - пенальці відавочны, а на трэцяй дададзенай хвіліне няўдала прыняў мяч ад Анюкевіча і быў нападнікам абкрадзены.

Шкада, але апусканне працягваецца. Турнірнае становішча каманды палохае і наводзіць на нядобрыя думкі. Пакуль гонім іх прэч і верым у лепшае. Час на выпраўленне сітуацыі яшчэ ёсць. Пакуль ёсць...

• Вынікі галасавання

  Назаві лепшага гульца «Нёмана» у матчу супраць «Тарпеда-БелАЗ»

  • Курганскі Сяргей
    11%
  • Пол Ролан Бебе Кінге
    21%
  • Сасноўскі Сяргей
    7%
  • Пазняк Аляксандр
    5%
  • Анюкевіч Аляксандр
    7%
  • Дурай Тарас
    9%
  • Кавалюк Сяргей
    3%
  • Васькоў Арцём
    11%
  • Васілюк Раман
    3%
  • Савіцкі Павел
    7%
  • Канцавы Арцём
    5%
  • Бомбель Артур
    8%
  • Журневіч Васіль
    6%

Игар КРЫВУШЭНКА (галоўны трэнер «Тарпедо-БелАЗ»):

– Папярэджваў хлопцаў, што гульня не будзе лёгкай. У Брэсце яны ў гэтым пераканаліся, сказаў, што прыкладна тое ж самае будзе і ў Гродне. Каманда у іх баявая, дома для сваіх гледачоў стараецца і гуляе, таму будзе бой. З нашага боку не зусім атрымаўся выхад у атаку, тое, што мы хацелі ў плане абароны мы практычна выканалі.

Гуляем у досыць шчыльным рэжыме. У нас няма тыднёвага цыкла, каб папрацаваць над якасцю. Таму такая якасць, як хуткасная цягавітасць у нас няшмат прытупілася. Тое, чым мы былі добрыя ў пачатку чэмпіянату – хуткі пераход пры перахопе мяча, вось гэтага нам на дадзеным этапе не хапае.

Важна тое, што атрымалі перамогу і набралі ў гэтай няпростай сітуацыі тры ачкі. Магу толькі падзякаваць хлопцам за характар.

– Як вы ахарактарызуеце гульню свайго брамніка ў моманце, калі картку атрымаў Канцавы (на самай справе, картка была паказана Фамічову, проста зроблена гэта было арбітрам няўмела – нат. прэс-службы клуба)?

– Гульнёй брамніка я незадаволены. Ён павінен быў другім дотыкам вынасіць мяч. А што далей было? А што, фол апошняй надзеі быў, ці што? Чаму не было карткі брамніку – гэта не да мяне, сябры. Была яна, не была. У нас пенальці не было ў Брэсце, але яго паставілі. А судзейства каментаваць? Я не каментую. Кожны робіць сваю працу. Калі вы шукаеце чорную котку ў чорнай пакоі, то яе там няма. Умейце трымаць удар...

Алег КІРЭНЯ (выконваючы абавязкі галоўнага трэнера «Нёмана»):

Сёння дзве каманды – адна ў белай форме, другая ў чорнай форме, гулялі супраць каманды ў зялёнай форме. Хлопцам сказаў дзякуй за гульню. Больш нічога каментаваць проста не хачу. Баюся нагаварыць лішняга.